Kopointutunan
Ponoriukan nopo diti nga’ kokomoi tungkus koubasanan, kawo kaadat-adato
sumuang do puru id Kampung Kiau Nuluh, Kota Belud. I nopo di pogulu, suai ko’
momutanom-tanom o tulun Kiau nga’ minsuang nogi do puru mongoi pongintorus.
Kopuruan nopo id posorili guas Nulu Nabalu nopo nga’ kinoyonon do tulun Kiau
mongintorus. Otumbayaan o tulun Kiau do kopuruan id posorili guas Nulu Nabalu di
nga’ kiharo mogion-gion om tamangan di sunduan posorili. Tumanud di Kundayis
Labeh om Justin Dalansun (2018), i nopo sunduan posorili id guas Nabalu nopo nga’
haro o sensitiviti do kowoowowoyon tulun id suang do kopuruan. Maya do
kotumbayaan di momoguno o tulun Kiau do boros puru om piipiro kooturan sabaagi
ponokosukuon diolo id puru.
Katayadan Kobolingkangan
Tumanud nopo koinganan ku sumuang puru id Kampung Kiau Nuluh, Kota Belud,
haro o piipiro boros puru om kooturan di pinosotol pogulu i sumuang puru. Maya diti
nokoimbulai di rahi ku mongintutun nunu boros puru di gunoon id puru. Sabaagi
poomitanan, momodos om wonod. Suai ko ii, haro nogi kooturan di pinosunud om
nuru do tonudon i kooturan soira sumuang do puru. Maya diti nokoimbulai dii
pomusarahan om rahi ku montok mongilo kopomogunoon boros puru om kooturan
sumuang puru id Kampung Kiau Nuluh, Kota Belud.
Objektif Ponoriukan
Objektif ponoriukan diti nopo nga’:
- Mongintutun boros puru id Kampung Kiau Nuluh, Kota Belud.
- Mongilo kooturan sumuang puru id kampung Kiau Nuluh, Kota Belud.
- Monorisid kapansalan kopomogunoon boros puru tumanud kooturan
sumuang puru id Kampung Kiau Nuluh, Kota Belud.
Tuhot Ponoriukan
- Nunu o boros puru di gunoon id Kampung Kiau Nuluh, Kota Belud?
- Nunu kooturan sumuang puru id kampung Kiau Nuluh, Kota Belud?