Kopointutunan
Nakasarabak o kopomogunaan Boros Kadazandusun id saalom do tulun boyungan
Dusunik sabap no do kinoimaganan akta palajalan 1996 i pinapadadi Boros Malayu
sabaagi boros penghantar id sikul. Kaantakan diti minamarahung do pomumusorou
komolohingan Dusunik montok mongubas tangaanak moboros Malayu mantad
tokoro’ montok kapansalan do pambalajalan do tangaanak. Notindohoi o kubasanan
moboros Malayu diti id saalom do sukod wagu Dusun gisom minogowit do
kosimbanon tuni kopomolombusan pimato /d/, /g/ om /ng/. Poindalanon o ponoriukan
diti montok mongintong kobolingkangan Boros Malayu mamarahung
kopomolombusan pimato sukod wagu Dusun id Kampung Tombongon Manggatal.
Kointalangan Kobolingkangan
Timpu baino, kogumuan sukod wagu Dusun au nasandadan moboros Dusun mantad
tokoro’ tu’ kogumuon nopo boros kumoiso’ diolo nga’ Boros Malayu. Ahal diti
minanahak bagas kumaa kopomolombusan sukod wagu Dusun om poimbida o
kaantakan diti id kogumuan sukod wagu Dusun id Kampung Tombongon Manggatal.
Kopionit do ahal diti, bagas Boros Malayu nopo id kopomolombusan sukod wagu
Dusun nga’ orongou id kopomoroitan pimato /d/, /g/ om ng/ tu’ kiwaa o pisuayan o
tuni pimato soira polombuson do sukod wagu Dusun i nasandadan moboros Malayu
miampai sukod wagu Dusun i nasandadan moboros Dusun mantad tokoro’.
Tudu Ponoriukan
i. Mongilo rahung boros Malayu id kopomolombusan pimato sukod wagu
Dusun maya popibagal o tuni kopomolombusan pimato sukod wagu
Dusun i nasandadan om au nasandadan moboros Dusun id Kampung
Tombongon Manggatal.
ii. Mongilo bagas kopomolombusan pimato sukod wagu Dusun i
nasandadan moboros Malayu kumaa pilumaagan tikid tadau diolo id
aspek do afektif om boros.