kiwaa piipiro aktiviti kokomoi do sundait id suang buuk teks Boros
Kadazandusun sikul tosiriba. Poomitanan, haro o aktiviti monupu sundait
kokomoi kakamot id sikul id suang do Buuk Teks BKD Toun 2. Mantad dii,
kaanu tangaanak do minsingilo monupu sundait tumanud koulalaho di
kosudong tu onuan do mongingia' kointalangan kokomoi koulalaho sundait
maya pongia'an.
Sumusuhut, kaanu o tangaanak do kosiwatan minsingumbal
popolombus do sundait maya pinsingilaan komponen kolumison boros id sikul.
Toud pinsingilaan nopo di milo gunoon nga maya audio rakaman informan om
toud suai miagal sinupu di Linah Bagu om Victor Baga tu haro CD pinaasil
miampai buuk i kaanu manahak tituduk kopolombusan do sundait. Okon nopo
ko ii, haro nogi piipiro konten kokomoi sundait id suang do aplikasi Youtube i
ouhan do maan sukuo'. Soira minsingumbal do popolombus sundait, kaanu
nogi ii popoingkawas kabaalan mambasa om moboros suai ko popoinggumu
tinimungan boros. Minopointalang o ponoriukan di Patrick Jolius et al. (2023)
do kawo sundait di sinoriuk do mononoriuk nopo nga poingimpou do subjek
kategori (sisimbar sundait) i popokito mogisuusuai tinimungan boros kopionit
do posorili, susumuni, kakamot, aktiviti pomutanaman, tayam, tionon, aktiviti
om koposion tikid tadau om boogian tinan do tulun.
Oponsol nogi o sundait moi kaanu o tangaanak sikul do monginonong
tungkus koubasanan tinaru Kadazandusun maya aspek kolumison boros tu
kopionit ii do koubasanan, roromu kesusasteraan om nilai estetika. Estetika
nopo nga gana koilaan di kaanu mogiboboros kokomoi kogingohon, laang do
aasil o toisoiso inus om poingkukuro sosongulun kaanu mamarati om
monginonong do karya inus dii (Nor Azman Ab. Aziz id suang Siti Nur Syakira
Ab Aziz, 2023). Nilai estetika id suang do sundait nopo nga kokomoi
kopomogunoon do komolohingan di pogulu do boros di oulud, olinuud om kirati
poinlisok. Sabaagi poomitanan, sundait ''asarap do modsidang, tadau-adau
kukupon no'' (sisimbar: walai do korut) i naanu mantad Buuk Nomungan
Sundait Kadazundusun sinuat di Ree John Daulip (2014) di popokito
kowoyowoyoo tulun Kadazandusun sabaagi momumutanom di mamagatang
do timpu om mindahu no pogulu koimbulai o tadau miagal nogi di korut tu
osuab po momonsoi walai diolo.