5.3 SOGU
Oponsol do potilombuson o ponoriukan kokomoi sundait Kadazandusun
montok momoruhang ponuatan om sukuon kokomoi koilaan sundait di
pinotungkus mantad komolohingan di pogulu po. Ogumu po aspek kokomoi
sundait di milo maan soriuko miagal do rati sundait, gaya om laras boros,
proses kapamansayan sundait om suusuai po. Suai ko ii, milo nogi
poindalanon o ponoriukan kokomoi sundait id kinoyonon suai tu mogisuusuai
o karalano, koulalaho om poomitanan do sundait tumanud kinoyonon. Oponsol
do inggumuan o kopolobusan buuk om audio sundait maya ponoriukan id
mogisusuai watas. Asil nopo do ponoriukan kokomoi sundait nga milo
poruhangon id kurikulum Boros Kadazandusun toi ko’ id suang kursus id IPG
miagal do kursus BKDB3163. Montok goos do papasarabak koilaan kokomoi
sundait, milo nogi poosilon iso buuk tinimungan sundait id Kampung Lokos om
poindalanon o pendigitalan maya liwang miagal do Wikipedia.
5.4 BAGAS
Koponguhup o ponoriukan diti do angkab poposuat do sundait di gunoon
komolohingan maso mongomot id Kampung Lokos miampai lobi atalang.
Mantad dii, oruhangan kawagu o ponoriukan kokomoi koubasanan sandad
tinaru Kadazandusun. Maya ponoriukan diti, kaanu o tulun ginumuan do
koilaan kokomoi sundait om popoimbulai kopurimanan diolo montok
momogompi om popotilombus tungkus koubasanan om kesusasteraan di
naanu mantad komolohingan moi au atalup.
5.4.1 BAGAS KUMAA TINAN SONDII
Solinaid monoodo do ponoriukan diti, nakaanu oku koilaan wagu om
kopomorotian miampai aralom kokomoi sundait di gunoon komolohingan
maso mongomot id Kampung Lokos. Nokopuriman oku nogi songkuro
kogingohon sundait id kinoyonon sondii om nounsub minggoos montok
mongumolig om popotilombus do koubasanan tinaru Kadazandusun. Sabaagi
mongingia’ timpu dumontol, nakaanu o ponoriukan diti manahak doho rahi om
motivasi montok popoia' sundait sabaagi lilihis tinungkusan tinaru
Kadazandusun om nogi sabaagi toud pinsingilaan montok kolumison boros.