koubasanan kumaa duo, kumoiso nopo nga ginama i gunoon id tindal om
kumoduo gianama di gunoon id waig. Oguno o ginama tindal diti montok
manabpo tayam di gunoon montok dodion do taakanon, toud do rusap om nogi
onuon o kulit tayam om wonsoyon do rasuk miagal ko’ palanuk,tambang,
bakas om ogumu po. Suai ko’ ilo, gunoon nogi o ginama tindal diti montok
manamong do tootonomon mooi do au raagon di tayam mamaamaraag.
Sumusuhut, ginama id waig, nopo diti nga kiula’ statik i kibontuk kukurungan
mooi do ouhan i sada do sumuang nga apagon do sumoliwan kawagu tu kiwaa
o pagantob di mogisuusuai (Riki Gunawan, 2019). Ginama diti kaanu
momogonop do koonuan toud protein montok kosulimbangan tinan. Mantad
dilo, pinoindalan o ponoriukan diti montok mogilo kokomoi ginama
koubasanan tinaru Dusun id Kampung Turuntungon Ranau, Sabah.
1 .2 KAPATAYADAN KOBOLINGKAHANGAN
Id pogun di nokoburu no babaino diti, mumbal nodi do tumalup o koubasanan
mongintorus tinaru Kadazandusun tu kogumuan nopo tinaru tokou do babaino
diti nga ogumu nodi toud kopogihuman kaakan-akanan miagal ko’ momoli
korinapaan toi ko’ kaakan-akanan tu ouhan. Montok dilo, kiwaa o piipiro
kobolingkaangan di nokoimbulai do taba’ di monoonoriuk montok popoindalan
ponoriukan kokomoi ginama diti. Kumoiso, mantad do topurimanan siilo kopio
di monoonoriuk kokomoi kasandadon om karalano do papataan ginama
koubasanan tinaru Dusun id Kampung Turuntungon Ranau om rahi di akawas
montok popoilang do asil ponoriukan kokomoi ginama koubasanan kumaa
tulun ginumuan. Id konteks diti, sabaagi songulun payat di nosusu id timpu di
nokoburu no, opurimanan di monoonoriuk do okuri no kopio oilaan kokomoi
do ginama koubasanan. Mantad dilo, nokounsub di monoonoriuk dii do
monoriuk kokomoi koubasanan di pinogitungkus-tungkusan diti mooi do au
atagak tomod otolon timpu.
Suai ko’ ilo, mantad do ponoriukan maya analisis dokumen nga okuri
po kopio o dokumentasi kokomoi do ginama dii nowonsoi dadi ahal diti
kopitindu do ponoriukan di W. Molijoh (2015) dii nokoboros do okuri po o