Dialect Poetry of Southern Italy (Italian Poetry in Translation Book 2)

Mi chiamastiru albiru di paci

Supra la sciara, ammenzu a li jinestri
fracchi di suli, alivu millinariu
sugnu stancu di cantu a lu sdisertu.
La me vuci evi filu di jirmana
ca nta la timpa giarna a marzu assuma
‘n silenziu p’’un svigghiari sgranci morti
a lu carruggiu stagghiatu.
Ogni ciura
di San Petru ca sboccia apri mimoria
di storia senza tempu,
e nta lu truncu
fràcitu e mascu accanzu chiantu leggiu
di cunigghia c’’un volunu mangiari.
Mi chiamastiru albiru di paci
e a Pasqua mi scancastiru li rami
pi nzupparili d’acqua biniditta
e nta li mani di li vostri figghi
nnuccenti spampanai zagara bianca.
Scunurtanza di lampa allammicusa
supra l’artariu maggiuri civava
ùmmiri oscuri a risciugari lacrimi
nta l’occhi di la Matri Addulurata.