mintingubas do momoguno Boros Kadazandusun tu’ noubas do boros suai. Teori
nopo di monokodung do rahung diti nga’ teori mentalis Chomsky hinonggo koonuan
nopo boros di poinsandad tangaanak nga’ kaanu mamarahung kumaa
kopomogunaan boros di gunoon tangaanak id pibarasan monikid tadau. Dadi soira
aanu i tangaanak do boros suai miagal ko’ Boros Malayu nga’ aiso dii o sunduan
diolo do minluda do Boros Kadazandusun.
Pomolingkuman, Sogu Om Bagas
Pomolingkuman
Ponoriukan nopo diti nga’ popointalang kokomoi do boros di gunoon id Kampung
Minonun. Boros nopo di gunoon nga’ sabaagi boros di apangkal om nogi insaru
gunoon soira mogibooboros kumaa paganakan toi ko’ tulun id Kampung Minonun.
Suai ko ii ponoriukan nogi diti nga’ kohompit no do mongilo rahung do
kopomogunoon boros suai ko’ Boros Kadazandusun di gunoon komolohingan kumaa
tangaanak diolo. Rahung nogi diti nga’ kohompit no ngawi do rahung mantad
paganakan, mantad posorili om susuai po. Oponsol do mongilo rahung do
kopomogunoon boros suai dii moi do koilo i mononoriuk do poposogu woyo
papasarabak om nogi popotindohoi diti kopomogunaan Boros Kadazandusun id
Kampung Minonun.
Sogu
Mantad do ponoriukan diti, haro piipiro sogu montok do ponoriukan sumusuhut,
montok koimaganan Boros Kadazandusun id Kampung Minonun om nogi montok
tulun ginumuan. Sogu nopo montok mononoriuk sumusuhut nga’ kokomoi do
kopomogunoon saiz populasi. Ogumu koluhuyon di okito soira momoguno skop
ponoriukan di okoro. Dadi, montok nopo ponoriukan dumontol nga’ alansan do
momoguno saiz populasi di lobi tagayo om popohompit tolu kinoyonon di misuai om
mioros moi do’ agayo sampel do ponoriukan om ogumu responden di milo gunoon.
Kinoyonon nopo dii nga Kampung Tiang, Kampung Dopou om nogi Kampung Tonop.
Sogu nopo di potilombus nga’, montok no do koimaganan Boros
Kadazandusun id Kampung Minonun. Alansan daa do soira haro kopoindalanan
ponoriukan miagal diti nga’ kopuriman o tulun id kinoyonon diti do kapansalan
kopomogunoon boros diti id pilumaagan monikid tadau. Soira nopo haro sunduan di