Kopointutunan
Boros Kadazandusun nopo nga nga iso’ boros tinungkusan di gunoon id pogun
Sabah. Aantakan 1997, nokoimpuun o kopongia’an Boros Kadazandusun id 15 sikul
tosiriba id pogun Sabah. Dialek nopo di gunoon sabaagi boros piawai om boros
susukuon nga dialek Bundu – Liwan. Ontok timpu baino, paajalon no o Boros
Kadazandusun id sikul tosiriba om sikul takawas sabaagi mato balajalan elektif om
gisom di dondo nosiliu o mato balajalan diti sabaagi subjek major id sikul takawas
IPG. Sundung po tu ingkaa, kopomogunoon Boros Kadazandusun nopo nga
mumang nodi kuri loolobi po tangaanak om tinimungan sukod wagu do dondo. Ahal
nopo diti nga sinokodung di Noor Aina Dani om Syeril Patrisia Kining (2016) i
minoboros do kopomogunoon boros Melayu id sikul nakaanu mamarahung
kopomogunoon boros diti id pilumaagan tangaanak tinaru Kadazan Dusun.
Kapatayadan Kobolingkaangan
Baino diti, kabaalan Boros Kadazandusun nopo nga oilaan maya taang koinabasan
id Boros Kadazandusun. Tumanud di Zawawi Ismail & Ab Halim Tamuri (2011) id
Ku Azizan, Jamali, & Rahman (2014) i minoboros do kabaalan mokinongou om
moboros nosiliu sabaagi kabaalan koiso’ soira id pibabarasan. Sundung po tu
ingkaa, timpu baino, kiwaa ogumu kobolingkaangan di tangaanak id pinsingilaan do
kabaalan diti loolobi po id taang koinabasan kabaalan mokinongou om moboros.
Sundung po tu ingkaa, nokoilo i minonoriuk do kiwaa tangaanak di kakal po abaal id
Boros Kadazandusun ontok timpu baino. Kes nopo diti nga iso’ kes di poimbida’
ontok timpu baino.
Objektif Soriuk
Piipiro objektif toi ko’ tudu soriukon diti :
i. Mongilo taang koinabasan kabaalan mokinongou om moboros boros
Kadazandusun tangaanak id SK Kaiduan, Papar.
ii. Mongilo faktor suang di mamarahung taang koinabasan kabaalan
mokinongou om moboros Boros Kadazandusun tangaanak id SK Kaiduan,
Papar.
iii. Mongilo faktor labus di mamarahung taang koinabasan kabaalan mokinongou
om moboros Boros Kadazandusun tangaanak id SK Kaiduan, Papar.