Implikasi Ponoriukan
Kopoindalanan nopo do ponoriukan diti nga’ kaanu popotungkus do toilaan kokomoi
diti sogit manatak tiwanon tinaru Dusun id Kampung Tibabar Kiulu Tamparuli, Sabah.
Maya koponoriukan do uhu diti nga’ au no do olihuan iti sogit manatak tiwanon id
aspek do kawo om nogi kopoindalanan diti sogit manatak tiwanon tinaru Dusun id
Kampung Tibabar Kiulu Tamparuli, Sabah. Sumusuhut, sundung aiso pionitan
kumaa pondidikan khusus no id pongia’an boros Kadazandusun o ponoriukan diti
nga’, maya kopoindalanan do ponoriukan diti, koburu no daa do o nutungan om
moral tongoulun soira adadangan diti toilaan kokomoi do sogit manatak tiwanon.
Maya asil ponoriukan diti, kopuriman no daa do iyolo do oponsol tomod susuyan do
piompinayan pogulu do miuhang-uhang om miongoi mooi do aiso koruol do ginawo
soira miongoi nga’ amu pasaga’on tu kipionitan do piompinayan. Suai ko mantad dii,
kaanu nogi popotungkus do koubasanan tinaru Dusun id aspek do kaadat-adato’
saalom adat pisasawaan mooi do au atalup aakan do timpu. Maya ponoriukan diti,
kogumu no daa do o sukuon kokomoi do sogit-sogit id pisasawaan loolobi no
kokomoi diti sogit manatak tiwanon.
Pomolingkuman
Maya kaida ponimungan data om pomorindakan data di ginuno, nosimbar ngawi o
tuhot soriuk id ponoriukan diti. Montok tuhot soriuk koiso’, “Nunu kawo do sogit
manatak tiwanon tinaru Dusun id Kampung Tibabar Kiulu Tamparuli, Sabah?”,
noilaan do kiwaa duo kawo sogit manatak tiwanon. Sogit manatak tiwanon nopo di
koiso’ nga’ pisasawaan di kipionitan do raha’ om koduo, pisasawaan di miniompinai
maya pisasawaan. Mantad dii, minog onuan do songinan wogok toi ko’ sabagu’ i
aansip (opiuhupan do monongiwan) sabaagi do sogit.
Montok tuhot soriuk koduo, “Poingkuro kopoindalanan do sogit manatak
tiwanon tinaru Dusun diti id Kampung Tibabar Kiulu Tamparuli, Sabah?”, noilaan do
onuan i kusai do timpu solinaid sontoun pogulu orikot tadau pisasawaan montok
mambayar do sogit dii kumaa di aansip. Pibarasan iti ontok tadau pihabayaan gisom
ookunan om asaga’an ngawi do puru di nokorikot id tadau pihabayaan diolo dii.
Sumusuhut, potilombuson no do o booboroson kumaa di minihaboi kokomoi talik om
pononsunudan di minog diolo okunon solinaid timpu sontoun pogulu orikot tadau
pisasawaan tumanud kookuan om kasaga’an koinsanai puru.