- Nunu kapansalan momoguno boros puru tumanud kooturan sumuang puru id
Kampung Kiau Nuluh, Kota Belud?
Pongintangan Literatur
Tumanud di Sely & Iskandar & Slamet (2019) pogulu i sumuang id talun papaharo o
tulun id Desa Gunam do ritual adat. Kitudu o ritual diti do mokianu kasagaan mantad
sunduan mooi do oinsanan aktiviti sumuang id Teringkang aiso o koroorosian,
kaantaban om au kotoguang do koligaganan maamaso id talun. Tumanud nogi di
Suhaila & Mohd Nizam & Atikullah (2013) pogulu i do tinaru Kampur sumuang do
talun mositi haro booboroson pogulu i sumuang mooi do mokianu kasagaan
sumuang do talun mantad sunduan posorili. Maya do booboroson diti, kaanu di
sunduan posorili do manamong diolo mantad koligaganan miagal ko au apalid. Id
suang ponoriukan di Hamidah Abdul Wahab (2013), pogulu sumuang talun maganu
o tinaru Melayu Sarawak do tana tokuri om poisison id rabas mooi do au
tompurosion di sunduan tangaarat id talun.
Metodologi Ponoriukan
Ponoriukan nopo diti nga’ momoguno kawo reka bontuk ponoriukan etnografi kikawo
kualitatif, montok mongintong kopomogunoon boros puru, kooturan om nogi
kapansalan momoguno boros puru tumanud kooturan sumuang puru id Kampung
Kiau Nuluh, Kota Belud. Mamampayat nopo di nopili ku nga’ soginumu do tolu tulun
di abaal momoguno boros puru om ogumu koinganan sumuang puru. Montok nopo
kaida ponoriukan di noguno monimung data id suang ponoriukan diti nopo nga’
ponorubungan, analisis dokumen om soriuk kopustakaan. Montok kaida
ponorubungan miampai mamampayat nga’ momoguno do tuhot separa struktur om
kibontuk poinralom mooi do ouhan i mamampayat do mamarati komoyon tuhot di
pinatahak montok mongilo do boros puru. Sumusuhut, montok kaida analisis
dokumen nopo nga’ minaganu data mantad buuk Sejarah dan Sistem Kehidupan
Tradisional Dusun Kiau. Buuk nopo diti nga pinosoliwan mantad Koisaan
Momogompi Tinungkusan Gulu-gulu om Kotulunan Sandad (GOMPITO). Noguno
nogi soriuk kopustakaan montok monokodung data ponoriukan di naanu maya do
kowonuon mantad kakamot miagal buuk toi ko’ kakamot elektronik om nogi
kowonuon mantad internet. Kogumuan nopo soriuk kopustakaan di noguno nga’
mantad do ponoriukan kokomoi koubasanan i haro pionitan do uhu ponoriukan.