Kampung Kiau Nuluh, Kota Belud. Maya diti oinsanan tulun sumuang id puru nuru
momoguno diti kooturan sabaagi susukuon soira sumuang puru id Kampung Kiau
Nuluh, Kota Belud. Haro nogi ukuman di nakatantu montok tulun di tumanud diti
kooturan.
Id timpu do kopoindalanan do ponoriukan diti, haro piipiro sogu ponoriukan di
milo powonsoyon montok popotilombus koponginlaaban do ponoriukan kaadat-adato
sumuang puru. Koiso, inlaaban o rontobon ponoriukan diti mooi do lobi ogumu data
di aanu kokomoi do kaadat-adato sumuang puru hilo id Kampung Kiau Nuluh, Kota
Belud. Kumoduo, monoriuk kaadat-adato sumuang puru di laid kaadat-adato om
kooturan sumuang puru di baabaino hilo id Kampung Kiau Nuluh, Kota Belud.
Baabaino diti, i nopo kopuruan hilo Kampung Kiau Nuluh nga nosiliu do Hutan
Lindungan Komuniti om nogi Eco Tourism. Kolimpupuson, ponoriukan boros puru id
gana semantik. Maya diti haro di kointalangan rati boros puru di nakatayad om minog
daa haro ponoriukan id gana semantik montok mogihum rati do boros puru.
Ponoriukan nopo diti nga’ kaanu manahak bagas kumaa kinoyonon
ponoriukan, pondidikan om nogi tulun ginumuan. Montok nopo id kinoyonon
ponoriukan nopo nga’ sabaagi iso’ dokumentasi montok popotindohoi do tungkus
koubasanan di notungkusan mantad komolohingan di laid id kinoyonon diti om kaanu
manahak kounsuban kumaa mogiigion do lobi mamagatang do tungkus koubasanan
om monginralom toilaan kokomoi kaada-adato sumuang puru hilo id Kampung Kiau
Nuluh, Kota Belud. Ponoriukan nogi diti nga’ manahak bagas kumaa pondidikan tu
kaanu momoruhang do nontodon toilaan kokomoi tinaru Dusun. Loolobi po kopio
kumaa mokiikinobos di minanganu Boros Kadazandusun id IPG montok kursus
Kearifan lokal. Suai ko ii, ponoriukan nogi diti nga’ kaanu popotounda liwang di alaab
montok koponginralaman do toilaan kokomoi koubasanan om sabaagi do
sosondihon montok koponoriukan kokomoi mogisuusuai kawo do kaadat-adaton
tinaru Dusun id gana pondidikan. Bagas montok tulun ginumuan nopo nga’ kaanu
mongilo kapansalan do mamantang om mamagatang di kaadat-adato pinotungkus
komolohingan di laid sumuang id puru loolobi po kopio tinaru Dusun om milo nogi
posuangon o asil ponoriukan diti id buuk Panduan Sekolah Adat Orang Asal sabaagi
do pinsingilaan adat tinaru Kadazan Dusun.