topurimanan di mokiikinongou id kaantakan otogod toi ko’ mongkoringau. Amu do
tinimungan Dusun polopukon o boros di kosinduol do ginawo soira moboros kokomoi
ahal di kotingayam mooi do amu otingayaman i barasan dii.
Momoguno nogi o tinimungan Dusun do boros eufemisme sabaagi pongolon
do boros koubasan di amu osonong karangahan soira roiton. Popokito iti do
tinimungan Dusun nopo nga’ akawas kopio o kolinuudan boros. Sosongulun di
momoguno boros di olinuud om alamaya soira moboros nopo nga’ ointutunan
sabaagi do tulun di akawas o kolinuudan boros om sosongulun i momoguno boros di
okobor om amu olinuud nopo nga’ ointutunan sabaagi songulun di araat. (Zaitul
Azma, Ahmad Fuad & Nur Hafizudin, 2011).
Mongilag Karaatan
Mongilag do karaatan nga’ iso’ nogi paktor kopomogunaan do boros eufemisme
tinaru Dusun id Kampung Borombon Kiulu. Momoguno o tinimungan Dusun do boros
eufemisme montok mongilag adadi o kaantakan di araat. Sabaagi poomitanan,
momoguno do boros eufemisme “tinoho” om “toburus” montok mongolon boros
koubasan i kaanu moninong do kosotia’an di nokopogulu do sangod mooi do amu
osukai i taru. Okito do kopomogunaan do boros eufemisme diti papadadi do boros
koubasan kumaa bontuk boros di olinuud mooi do oilag i karaatan. Tumanud di Albar
Yudyantoro om Atiqa Sabardila (2013), kitudu o boros eufemisme montok mongilag
bagas di koundorosi.
Suai ko iri, kopomogunaan do boros eufemisme montok mongilag do
karaatan diti nga’ oguno sabap no ponontudukan mantad molohing di pogulu.
Momoguno o tulun Dusun do boros eufemisme id koposion diolo tu tinudukan do
molohing. Sabaagi poomitanan boros “tulun tokoro” om “tulun tagayo” gunoon
montok mongolon do boros “siwot dalan” om “tompulolo’oi” i kobunsakit om
mangasau do tulun. Gunoon o boros eufemisme mooi do amu tumanud do muli i
sunduan di taraat. Popokito iti do momoguno o tinimungan Dusun do eufemisme
montok mantamong kotoronongon do koposion. Osokodung iti di Wijana (2008) id
suang do ponoriukan di Amelia Yuli (2016), gunoon o eufemisme sabaagi iso’
kakamot mamagampot kotoronongon om koumoligan.