Mamantang Ahal di Osoding
Id tinimungan Dusun, oguno o boros eufemisme montok mamantang ahal di osoding
loolobi no kopio kokomoi kapatayon. Kapatayon nopo nga’ iso’ kaantakan di
awayaan oinsanan do tulun hiti id pomogunan. Kaantakan kapatayon nopo nga iso’
kaantakan di olunggui om minog do pantangon. Mantad di, kitudu o boros eufemisme
montok mamantang koduduo di tuminongkiad dii. Sabaagi poomitanan,
kopomogunaan boros eufemisme kokomoi kapatayon miagal do “minidu pogun”
mongolon boros “napatai”, “rodto” montok mongolon boros “rata” om “tiagak” sabaagi
boros pomolohou montok mamantang di noiduan ginawo om paganakan dau.
Popokito iti do obimpantang o tinimungan Dusun tu amu polopukon do poboros ahal
di kaanu moninduol ginawo tulun. Osokodung iti do ponoriukan di Hamidah Wahab
et.al, (2016), kopomogunaan do eufemisme id domain kapatayon nopo nga’
poinsarabak id koubasanan isoiso’ tinaru tu ahal nopo diti nga’ iso’ ahal di osoding.
Suai ko iri, ahal kapatayon nopo nga’ kaanu popoimbulai mogisuusuai komi
om topurimanan kumaa di mokinongou tumanud ralan kopomolombusan om
kopomogunaan boros di poposunud. Mantad dii, momoguno o tinimungan Dusun do
eufemisme kokomoi kapatayon mooi do amu kotigowo om amu modosi i sunudan.
Tumanud di Hontong, Lasut, & Rambing (2022), amu posondoton moboros o boros
kokomoi kapatayon tu iri nopo nga’ ahal di tabu om kopogowit do korosian om amu
olinuud nung poboroson maya potilombus. Dadi, maya kopomogunaan do
eufemisme, kaanu ii do monginkuri korosian kumaa di sunudan toi ko’ i korongou.
Maya kopomogunaan do eufemisme, kaanu ii papagaan topurimanan natagakan do
sondihon kumaa paganakan poinsomok di notongkiadan.
Mionit Koubasan om Kotumbayaan Tinimungan Dusun
Kopomogunaan do eufemisme tinaru Dusun nopo nga’ haro nogi pionitan kumaa
koubasanan om kotumbayaan tinimungan Dusun. Id koposion do tulun Dusun,
ogumu o koubasan om okito iri id piipiro aspek miagal ko antakan mananom do
parai, sumuang do puru, kinosusuon do tanak, om momorujuk do Kinorohingan.
Sabaagi poomitanan, koubasanan sumuang puru. Momoguno o tinimungan Dusun
do eufemisme “mokikodut-kodut i daando haro no osolowot dokoyu” montok
mongolon do boros koubasan “onuan oku no dupot haro no aanu dokoyu”.
Otumbayaan o tulun Dusun do poboroson nopo boros koubasan dilo nga’ kaanu
monulang do kaantakan di osonong. Popokito iti do momonsol o tinimungan Dusun