ii pohoroon kalapas ababayan poogot haboi. Ababayan monogit diti kahangkum
do tolu taang timpu, ii no tu timpu pogulu, maamaso om kalapas ababayan
monogit. Kalapas koindalan o ababayan monogit, kawasa nodii potilombuson o
pisasawaan. Maya no ngawi do asil di naanu diti, nodimpot dii o tudu ponoriukan
om tuhot soriuk nga’ nosimbar nogi.
Id suang aspek bagas, kinopoindalanan ponoriukan diti nakaanu
popoimbulai kolumison koubasanan tinaru Kadazan Dusun id Sabah ii
mogisuusuai. Suai ko ii, asil ponuatan ii nakaasil mantad ponoriukan diti kaanu
monguhup momogompi koubasanan adat tinaru Kadazan Dusun loolobi no montok
tulun Dusun Bundu. Id suang konteks ponginabasan, kinopoindalanan nopo do
ponoriukan diti nga’ kaanu popoinggumu tangkob boros Boros Kadazandusun dii
mamambasa’. Ahal nopo diti nga’ ingkaa tu’ kiwaa piipiro kopomogunoon istila id
suang ponoriukan diti ii misuai mantad istila di gunoon id kinoyonon suai.
Sabaagi suul timpu obontol, kawasa poindalanon o ponoriukan ii
mongintong piagalan om pisuayan sogit pisasawaan miobpinai id Kampung Tomis
Mangi Pangi miampai kinoyonon di suai. Sumusuhut, popoindalan ponoriukan
timpu obontol ii manahak pokus poimbida’ kumaa tikid-tikid sogit ii poinsuang id
kaadat-adato’ pisasawaan miobpinai. Kawasa nogi maan soriuko o kinosimbanon
kaadat-adato’ sogit pisasawaan kipionitan piobpinayan tulun Dusun Bundu id
Kampung Tomis Mangi Pangi timpu pogulu om timpu baino.