Tudu Ponoriukan
i. Mongintutun pisuayan koroitan dialek Liwan id watas Tambunan om Ranau,
Sabah.
ii. Mongintutun pisuayan fonem dialek Liwan id watas Tambunan om Ranau,
Sabah.
Tuhot Ponoriukan
i. Nunu pisuayan koroitan dialek Liwan id watas Tambunan om Ranau,
Sabah?
ii. Nunu pisuayan fonem dialek Liwan id watas Tambunan om Ranau,
Sabah?
Pongintangan Literatur
Ponoriukan pogulu i kiwaa pionitan kokomoi dialek nopo nga miagal ponoriukan di
Dayu Sansalu (2013), Selviana Zeno, (2018), Minah Sintian (2017) om ponoriukan di
Arlynz Esty Alouis, (2020) i monikid kiuhu “Persamaan dan Perbezaan Sebutan dan
Makna dalam Pelbagai Dialek Bahasa Kadazandusun”, “Fonologi Dialek Dusun
Liwan Tambunan”, “Variasi Leksikal Dalam Dialek Keluarga Dusun Di Sabah” om
“Dusun Liwan: Prosodi id Kampung Matan Ranau”. Monikid asil ponoriukan diti
popokito asil ponoriukan kokomoi kopomogunoon isoiso’ dialek nga au poimpokus
kumaa koroitan om fonem dialek Liwan miampai poinralom.
Metodologi Ponoriukan
Rika bontuk do ponoriukan nopo diti nga ponoriukan kes i momoguno
ponginsamakan do kulaitatif, montok mongintutun pisuayan koroitan om pisuayan
fonem dialek Liwan. Ponoriukan kes nopo nga papanahon mantad no do sabap-
sabap miagal do abaabayan, kaantakan toi ko’ kobolingkangan di popokito
kowoowoyoon posorili di poimbida om nogi ii au po nosiliu o kaantakan (Kardos &
Smith, 1979). Responden nopo di nopili montok popoindalan do ponoriukan diti nga
soginumu do 6 tulun om koinsanai responden diti pilion mantad komolohingan i
poinsandad om nogi tulun i abaal moomoboros dialek Liwan i poingiyon id watas
Tambunan om Ranau, Sabah. Dadi, soginumu 3 responden mantad watas
Tambunan om 3 responden mantad watas Ranau.
Instrumen ponoriukan i gunoon montok monimung data kokomoi pisuayan koroitan
om pisuayan fonem dialek Liwan diti nga momoguno kaida ponorubungan kistruktur,
kaida pongintangan au mampayat om kaida analisis dokumen. Kopomogunoon do
kotolu-tolu instrumen ponoriukan montok monimung do data ponoriukan diti kaanu