soroturu’-turu’ kosuusukupan koposion do tulun miagal ko’ piring, sudu’ om suusuai
po. Tumanud nopo kooturan adat sandad Kampung Tomis Mangi Pangi, nokito do ii
nopo gulu po, nung kiwaa koulakan adat miagal diti, posuangon o misasawo dii id
gandang, onuan do dangol, lansang, masis, korob do guol, parai, gorouk om
porulunon nondo id bawang. Poingkuro po, soira pinomusarahan om
pinogibaabarasan kawagu iti adat, nasaga’an dii do maan inggaanai bontuk do
sogit di koontok. Mantad dilo, sogit soroturu’-turu’ nopo di baino diti nga’ kopogowit
podii do turu’ tinan karabou nga’ kakal po au pakawasaon do miongoi om uyungon
mantad pogun Sabah.
Pisasawaan mipinsan koiso’ om koduo nga’ kakal po nogi au pakawasaon
do miongoi om nung oilaan do kiwaa pionitan piobpinayan tulun di miuhang-uhang
dii, pokionuon iyolo do miada’. Sokiro nopo kiwaa koulakan adat, oontok iyolo do
sogit soroturu’-turu’. Pisasawaan mipinsan kotolu nopo nga’ ‘opodos’ po kopio om
tumanud nopo daa kooturan adat, au po kawasa miongoi toi ko’ misawo. Nung
kiwaa koulakan adat, oontok iyolo do sumbang koili ii kopogowit danda songinan
karabou om oruhangan kawagu sogit panatak tiwanon, sogit sumbang kampung,
sogit kampung om sopiiso’ kakanan om nogi dangol. Mantad dilo, miagal di okito id
suang Jadual 1, danda nopo di nuru patahakon montok pisasawaan pinsan kotolu
nga’ kaampai no do tolu tinan karabou, songinan wogok, iso’ kakanan om iso’
dangol.
Pinsan kaapat nopo nga’ kawasa no do miongoi. Poingkuro po, kakal po
iyolo oontok do sogit ii roitan do sogit panatak tiwanon ii kopogowit danda songinan
kambing. Pisasawaan miobpinai miampai taang piobpinayan di misuai nopo nga’
oontok do sogit ii roitan sabaagi adat rompok. Sosongulun mantad sinakagon
kotolu ii miuhang-uhang miampai sosongulun mantad sinakagon kaapat nuru
manahak songinan karabou sabaagi danda montok adat rompok pogulu po
potilombuson diolo o pisasawaan diolo.
Asil ponoriukan pinopokito nogi do pisasawaan miobpinai mantad
koinsanai piinsamakan piobpinayan oontok do sogit adat pitas ii kituduan momitas
piobpinayan tulun di miuhang-uhang dii. Suai ko’ ii, sogit kampung, adat
kopomohuyasan toi ko’ kapamaraagan piobpinayan om adat panatak tiwanon nga’
koontok nogi montok koinsanai pisasawaan miobpinai. Adat kopomohuyasan
piobpinayan nopo nga’ insan no do koontok montok iso’ puru paganakanan tagayo.
Komoyon nopo, sogit nopo diti nga’ koontok montok pisasawaan miobpinai di
kumoinsan nogi id suang isoiso’ puru paganakan. Montok nopo do adat panatakan